بونو یازمادان کئشکه رسام اولوب رسمینی چکردیم!

بونو یازمادان کئشکه رسام اولوب رسمینی چکردیم!

بیر نئچه گون بوندان قاباق سویوق دیمیشدی بیلَمه، آنفولانزانین قورخوسوندان گئدیم بیر دوکتور داوا درمان ائله سین بلکه اوزونا چکمه سین دئدیم. شوکور اولسون آللاها اورمیه ده گئجه نی اؤلسن ده بیر تک متخصص دوکتور خارابا قالمامیش بیمارستانلاردا تاپا بیلمه سن. دئیه سن بیر تک فارابی درمانگاهی کؤکو بو بی عرضه درمان سیستمینین جورون چکمه لی دیر. پیلله لرده آدام قیمبیللایر سانکی. یئنه ساغ اولسون دوکتور عطاپورو فارابی ده چالیشان بیر چوخ متخصص ایله گونوزدن علاوه گئجه گلن نوخوشلارین دادینا چاتیر.

نوبت آلیب صندل ده ایلشمیشدیم بلکه نوبتیم چاتسین. بیر بالاجا قیز اوشاقی ایله آناسی دیققتیمی چکدی. دئیه سن حئیوان اوشاقا اینه یا سرم وورموشدولار تزریقات اوتاغیندان گؤزلری دولوب چوخ بئحال چیخاراق آناسی الیندن یاپیشیب، آغلاما منیم بالام دئیه گئدیردیلر. وندینگ یخچالا چاتدینجا بالاجا اوشاق آناسینین الینی چکیب بللی ایدیر کی نم نمنه یه یخچالدا گؤزو دوشوب اونو ایسته ییردی آلسین بیله سینه. آناسی یازیق بللی ایدیر یوخسول اولاراق بیر آن دوروخوب قالدی کی گئتسین یا بالاجا خسته اوشاقینین ایسته یینی یئرینه یئتیرسین.

بو آنلار ائله بیل ثانیه ثانیه ذهنیمده تصویره چکیلیردی. آللاه آللاه ائلیردیم آلا بیلسینلر. حتی اؤزومه بو جسارتی وئرمکه چالیشیردیم کی اولماسا من دوروب کارت چکیم آلیم. آما یوخ، داغ کیمی بیر آنانین خالق ایچره غرورونا توخونماق اولماز. خدایا خداوندا نه اولاجاق ایندی. چوخ شوکور آنا بیر آن دوروخاندان سونرا قاییدیب کارت چکیب اوشاق ایسته یه نی آلدی. بالاجا بیر صورتی بسته ایدی لواشک ایدی نه ایدی. اینان آللاها گؤیچک اوزلو بالاجا شیرین اوشاق بسته نی الینه آلدیقدا سانکی گؤزلری گولوردو، او اوزدن بو اوزه اولدو. کاش کی او بیرآنی رسام اولاراق تصویره چکیب جاماکایا سالاردیم.

بیر نئچه ثانیه بوندان قاباغا دک گؤزلری دولان بالاجا قیزین گؤزلری گؤلوردو ایندی و داها گؤزل تصویر بو کی آناسی اییلیب بالاسینین اوزوندن اؤپوب یولا دوزولوب گئتدیلر.

آللاه هئچ آتا ـ آنانی اوشاقی یانیندا شرمنده ائله مه سین و بو شرمنده لییه سبب اولانلارین اوزو قره اولسون.

محمدعلی ـ ارجمندی 041016