بی

بو شکیلی یئددی ـ سکگیز ایل بوندان بری سیزده بدر گونو اورمونون شهرچایی بندینین ساحیلینده چکسک بئله سانکی آراز قیراغی ساحیلی خاطیرلاییردی. قدیم ناخجیوان خانلیغینین آراز قیراغی نازیک کندینده آنادان اولان عمه لریم (ساغیمدا صفیه عمه م، سولومدا سریه عمه م) ده بونا گؤره سئوینج دولو حیسلر یاشاییردیلار. کئچن گونلرده نه یازیق کی سَریه عمه می ایتیردیم. الوداع دئیرک دونیاسینی دییشدی و بیرتک صفیه عمه م قالدی اونوندا روحسال دورومو ائله خوش دئییل. کئشکه صفیه عمه مین ده بیر قیزی اولاردی آنا اوچون اوغلان نه قدر عزیز اولسادا، دینیب ـ دانیشیب دردلشمه یه قیزین بام باشقا یئری وار.

بیزیم ائو ایله سریه عمه مین گیلین ائولری دووار به دووار اولدوغونا گؤره گؤزومو آچاندان بری ایل به ایل، گون به گون، ساعات به ساعات ذهنیمده سانکی مینلرجه خاطیره ثبت اولوب. بیر او قدر قانی ایستی و مهریبان بیریسی ایدیر کی سؤزه گلمز. ائله اونا گؤره ده یادیما دوشدوکده اوره ییم سیخیلیر. آدیم بؤیوک آغام محمدعلی دن یادیگار قالاراق سن منیم آغامسان دئیه قوللارینی بوینوما سالیب باغرینا باساردی.

ائولرینه قوناق گلدیکده سوفرا باشی اولا یوخسا یئر یئمیش گتیردیکده جانیم چک یئدا جاوان آدام سان سؤزو دیلیندن یئره دوشمزدی. ها دئنن عمه قادان آلیم یاخجی، واللاه یئیه بیلمیرم دئسنده، یئنه بیر دور تسبحئینده آللاه پیغمبری آند وئررک آخیردا یئنه گؤز گؤز ائدرک سوفرا باشیندا سنین خبرین اولمادان بوشقابی قالییاجاق ایدی. یانی یانیندا یئمیرم، مئیلیم چکمیر بئله شوخلوغوموز یوخ ایدی.

ائوینده بیر تک پنجره یوخسا تاختا تاباق تاپمازایدین الوان الوان گولدانلاری ایله دولو اولماسین. الینه کئچن هر بیر گولدن بیربارماق قوپاردیب ساخسی گولدانا یا خود قاتیق قابینا سالیب قلم قویاردی. سونرا بئجریب هامی یا پای وئرردی. سون بئشیک اوشاغی توحید ایدی ازدیریب «توتو» سسلردی بیله سین. توتو گل بالامسان بو گولدانلاری آپار دوز حیطه دییردی.

هئچ یادیمدان چیخماز بیر دفعه حیطلرینده رحمتلیک مَش زیلفعلی داییم ایله بؤیوک بیبوغلوم عسکر سو لوله سی یئری قازیردیلار داشا چیخمیشدیلار، خئیلک الشندن سونرا داشین آلتینی اویوب بوشاتمیشدیلار لاب آخیردا توحید گلیب بیر ایکی کولوح ووروب داشی چیخارتدیم دئدی. ایندی بیر یول عمه م فخر ائدرک اورکدن دئییر: ماشاللاه منیم کلچه بالام. قوچوم منیم.

خاطیره لر سایا گلمز! هله قوی سیزه دئییم بی بی مین بیمارستان دا قیز بَینمه سیندن. کئچن ایل قلبینه گؤره بیمارستان دا بستری اولدوقدا گؤروشونه گئتمیشدیم گؤردوم پرستارلارین بیرینی دانیشیقا توتوب نئجه گؤزل دانیشیر: دئنن گؤروم یاشین نئچه دی گؤیچک قیز؟ و ... سلام عمه نئجه سن قادایین آلاردیم سنین. گؤردوم منه قاش گؤزوب ائدیب یاخین گل دئییر: اییلمیشم قولاغینا ساری جانیم عمه نه دئییرسن: ـ بیر باخ گؤر قاش گؤزونو بینیرسن یا یوخ؟

ـ هله یاخجی عمه دانیشاریق ایندی پیسدی عاییب دیر دئدیم. یازیق پرستاردا مطلبی باشا دوشرک تم تلسیک سرومو باغلاییب چیخدی. گؤردو کی قیز چیخدی ائشییه لاب آرخایین باشلادی دانلاماغا: عمه جانی گؤردون بویونو بوخومونو، قره قاش گؤزلوغونو. گل سؤزومه قولاق آسین بیر جوت گؤزل قیزدیر بیرینی سن گؤتور بیرینی ده توحید. بو آرادا خدیجه باجیمین بارماغینی دا کَسسَن خبری اولماز گولوب دئییر: آنا آخی ایندی بو سؤزلرین یئری دیر.

تینین شاد و یولون گئدرلی اولسون آی بی بی

محمدعلی ارجمندی ـ 041130